Interview Charis

Full-time working mom Charis

(Moeder van 2 zonen van 4 en 10 jaar)

1. Kua ta bo situashon aktual?
Aktualmente mi ta laga mi yunan bai opvang despues di skol. Parti merdia, pa ami por bai trabou.

2. Kiko tbt e motibu pa bo eskoho?
Mi a skohe esaki, dor ku mi ta traha i mi no por ta na kas ku nan. Tambe bayendo opvang mi yunan ta siña mas tantu kos ku si nan keda kas. Tambe nan ta siña interkambia ku diferente otro mucha i diferente otro karakter. Nan ta traha riba nan desaroyo, siña kompartí i siña hunga ku otro muchanan di nan edat. I esaki pa ami ta hopi importante.

3. For di kuantu luna nan a bai opvang?
Tur 2 a bai for di dia nan tabata baby chikitu ku 6 siman. Esaki tabata hopi difisil, pa laga mi yunan kuminsa bai un opvang chikitu asina. I konfia un otro hende ku mi baby.

4. Kon bo ta eksperensia esaki?
Eta un sintimentu miksto. Apesar ku mi sa ku mi ta hasie pa nan bon. Mi ta sinti un tiki ‘schuldgevoel’ tin ora ku mi no ta pasa sufisiente tempu huntu ku nan. Mi ke duna nan asina tantu di mi banda, pero tambe mi mester traha. Esaki ta pone ku mi tempu ku nan ta asina tiki. 

5. Kua eskoho of kombinashon di eskoho pabo lo ta ideal?
Pa den futuro, lo mi preferá traha menos den siman. Ku mi yunan por pasa tempu ku mi tambe. Lo mi ke dediká mas tempu huntu ku nan despues di skol, hasi ‘huiswerk’ ku nan i tambe sobra tempu pa hasi kosnan leuk òf ku mi por hiba nan por ehèmpel deporte òf landamentu.

6. Kiko pa bo ta e bentahanan di laga bo yu bai opvang?
E kos di mas importante pa ami ta ku nan ta krea amistad, konosé otro muchanan i siña dil ku diferente karakter. Tambe ta dushi pa ora bo buska nan, nan tin hopi kos di konta i nan ta konta bo kon a bai.

7. Kiko pa bo ta e desbentahanan?
Desbentaha por ta ku nan por siña kosnan robes di otro mucha tambe. I por bin purba praktika e kosnan ku mi òf na kas. Pero einan mi edukashon pa ku nan ta hunga un ròl. Mi tin 2 yu hòmber i lo mi ke lanta i eduká nan bon, pa nan por ta un ehèmpel den nos komunidat!

8. Kiko ta un konseho ku lo bo ke duna otro mayornan?
Ami lo bisa otro mayornan pa no tene miedu di hiba bo yu un opvang. Buska un opvang bon ku kalidat i laga bo yu bai. Esaki lo yud’e hopi den su desaroyo. I no ta paso bo yu ta bai opvang henter dia. Esaki ta nifika ku abo komo mayor no por dun’e su ‘quality time’ (ku bo). Buska e buraku i krea e ‘band’ ku bo yu. Mi yunan por ehèmpel ta apresia kosnan chikitu. I muchanan por lo general ta apresia djis e tempu ku nan pasa ku bo. E no mester ta ni largu. Djis sinta lesa un buki òf hunga un spèl of djis sinta na mesa kome i kombèrsa di e dia. Muchanan ta sintinan apresia di djis sa ku nan mama òf papa tin tempu pa nan i ta skucha nan.